ЧАМД Л ХАРУУЛАХ ГЭЭД

Чамд л харуулах гээд

Харанхуйн өнгөтэй цамцныхаа

Энгэрт би

Эрвээхэй зүүж очсон

Цээжнээс минь

Цэцэгс үнэртсэн гэж тэр надад хэлсэн

Чамд л харуулах гээд

Усан мэт өнгөт

Хумсныхаа толион дээр

Цалин цасыг будрааж

Түүний гэгээнд үзэг минь хүртэл

Гялбасан гэж тэр хэлсэн

Чамд л харуулах гээд

Уйтгарт харцныхаа

Гүн тусгалыг далдлах гэж

Уран ялдам инээмсэглэл барьж оёод

Тэнгэрийн оддыг хацартаа түгээж

Тэр болзоонд би очсон

Харин чи. . .

Навчис бударсан хүйтэн өдрөөр яаж

Эрвээхэй зүүж ирснийг минь ажаагүй

Надаас, гаран дээр минь яагаад

Цас хайлахгүй байгаа ч асуугаагүй

Инээмсэглэлээс минь үүлгүй хэрнээ

Бороо ороод байгааг ч үзээгүй

Энэ өдөо би ганцхан чамд л зориулж

Өөртөө орчлонг дурлуулсныг мэдээгүй ээ. . .

Эх сурвалж: Э.Бүжинлхам