ГАРАА САЙН БОЛ БАРИА САЙН

Премьер лигийн нээлтээ өнгөрсөн улирлын аваргууд ширүүхэн хийв. Тэд Вест Бромвичийг хүлээн авч 6:0-ээр бут цохьлоо. Дидье Дрогба хет-трик хийж шинэ улиралд гоолуудыг угсруулахаа харуулллаа. Франц легионер Ф.Малудо 2, багийн символ Фрэнк Лампард 1 гоол тус тус хийсэн байна.

Вест Бромийг экс Челси тоглогч Роберто Ди Маттео дасгалжуулж буй ч баг нь Челсид ёстой юу ч болсонгүй.

Тоглолтын дараа Анчелотти 6:0 гэсэн ялалт бол тийм сүйдтэй онцгүй зүйл биш, манай баг өөрсдийн ажлаа л хийсэн гэсэн ихэмсэг дүгнэлт хийжээ. “Энэ баг иймэрхүү олон гоолууд хийж чадна гэдгээ харууллаа. Бид хэцүү улирлын өмнөх тоглолтуудтай учирсан. Харин одоо эргээд бүх зүйл ОК болж байна. Бид сайн тоглож олон гоол хийлээ, үүнд сэтгэл хангалуун байгаа. 2 дахь гоолоос хойш илүү зай гарч бидэнд бүр амар болсон. Тоглогчид ДАШТ-ийн дараах сэргэлтээ ирэх 2 долоо хоногт бүрэн авч, 100 хувь болно” гэв.

Өнгөрсөн улиралд 29 гоол хийсэн Дрогба зун хагалгаа хийлгэсэн ч тун сайн тоглосон. Түүний талаар Итали босс: “Тэр гайхалтай тоглолоо. Зөвхөн гоолууд хийсэнд бус, тоглолтын турш хичээж зүтгэж, тэмцэж байсан. Энэ бол манай довтлогчдын маш чухал чанар. Өнгөрсөн улиралд Дрогба олон гоол хийсэн. Энэ улирлын гараагаа үнэхээр сайхан эхлүүллээ. Өнгөрсөн жилийн тоглолтоо энэ жил ч давтана гэж би бодож байна ” гэжээ.

Челсигийн 17 сая фунтийн үнэтэй шинэ тоглогч Рамирес ирэх долоо хоногт Уигантай хийх тоглолтонд оролцох бололтой.

Аваргаа байг гэхэд эхний 4 байрын төлөө өрсөлдөх эрмэлзлэлтэй 2 баг болох Тоттенхэм, Манчестер Сити багууд эхний тойрогт учраа таарч 0:0-ээр тэнцэв. Тоттенхэмийн талбайд болсон энэ тоглолтонд талбайн эзэд тоглолтын турш илүү байж, боломжуудыг гаргаж байсан ч Ситигийн хаалгач Жо Харт үнэхээр сайн тоглосон. Тэрээр Дефо, Хаддлстоун, Ассу-Екотто болон Бэйлийн цохилтуудад ворлд-класс хаалт хийж байлаа. Энэ маягаараа бол Шэй Гивенд боломж гарахгүй юм биш үү?

Манчини хэлэхдээ “Харт номер 1. Гэхдээ одоогоор. Баг 4 тэмцээнд оролцох тул Гивен бидэнд хэрэгтэй. Би нэг л хаалгач өнөөдөр сонгох байсан, тэгээд Хартийг сонгосон. Тэр маш сайн тоглолоо. Үүнд сэтгэл хангалуун байна” гэжээ.

Ситигээс Яаяа Туре, Давид Силвьа, Александр Коларов гэсэн шинэ тоглогчид нь шууд гараанд гарсан хэдий ч Сильва, Коларов нар бол сайн тоглолт гаргаагүй. Харин Марио Балотелли хараахан багийн гишүүн болж амжаагүй байсан тул сэлгээнд ч байгаагүй юм. Итали залуу ирэх тойргийн тоглолтонд тоглох боломжтой.

Дээд лигт шинээр орж ирсэн Блэкпул эхний тойрогт Уиганыг 4:0-джээ.

Даунинг, Петров, Милнер нарын гоолоор Астон Вилла эхний учраа Вест Хэмийг 3:0-ээр хожиж гараагаа сайхан эхлүүлэв.

Бирмингем Сандерландад 0:2-оор хожигдож яваад 2 гоол нөхөн хийж оноо салгаж дөнгөсөн байна.

Тим Ховардийн алдааг ашиглаж Никола Калинич гоол хийснээр Блекбэрн талбай дээрээ Эвертонийг хожжээ.

Дэвид Жоунс гайхалтай гоол хийж Вулвс Стоукийг 2:1-ээр хожиж.

Марк Хьюз анх удаа Фулхэмийг удирдаж Болтонтой гоолгүй тэнцэв.

Премьер лигийн эхний тойргийн үлдсэн ганц тоглолт өнөө орой Манчестер Юнайтед – Ньюкаслийн хооронд болно.